近年機械鍵盤唔單只係一眾遊戲玩家必需嘅裝備，更加發展成一種生活興趣，所以除咗好打、好聲之外，「好靚」亦係大家選購機械鍵盤時嘅嘅重要標準之一。而位於美國嘅電腦週邊品牌Higround就即將推出一系列以經典格鬥遊戲《Street Fighter II》為主題，真真正正「好好打」嘅機械鍵盤。

Higround今次一共會推出四款機械鍵盤。其中主打款式係基於品牌旗下「Summit 65」鍵盤設計嘅「彩色豪鬼」版。鍵盤本體用上65鍵佈局 (即係冇哂F1-F12、方向箭咀同右方數字鍵)，鋁金屬機身配上自家製鍵軸，仲有可自定義嘅RGB燈光以及另附特別鍵帽，底部就有豪鬼嘅「天」字標誌。

「彩色豪鬼」之下再分兩個款式，分別係紅框版同黑框版，當中紅框版為日本限定。

另外，Higround亦會用旗下另一個鍵盤系列，同「Summit 65」基本一樣但用上膠框嘅「Basecamp 65」設計出另外三款聯乘作。當中包括「單色豪鬼」、「阿隆大戰春麗」，以及集合所有《Street Fighter II》角色彩繪嘅版本。今次聯乘亦會有滑鼠墊、T恤等其他週邊。

Higround官網將會於香港時間20日凌晨5點起接受預定。值得一提嘅係，目前官方話銷售地點只限歐美及日本，身在香港嘅大家可能要另尋方法購買啦。

資料來源：Higround