為慶祝《食鬼 PAC-MAN》問世43周年，最近LEGO Icons系列同Bandai Namco合作推出復古街機積木套裝「PAC-MAN Arcade 10323」，重現80年代經典回憶！

呢款模型由2,651塊零件組成，完成組裝後高32cm、寬25cm、深17cm，唔算太大部唔使驚屋企冇位擺，忠實還原街機外型、搖桿、計分板等細節，而且投幣口仲內置LED燈識得發光。並以機械組件還原遊玩情況，玩家只要轉動機身旁嘅把手，就可以模擬Pac-Man躲避鬼魂食豆嘅畫面，計分板上嘅數字亦會同步變更。

除咗街機本體之外，套裝亦包括一個獨立展示台，展示Pac-Man、Blinky（紅色鬼魂）及Clyde（橙色鬼魂）三位角色，更可透過底座機關，切換成鬼魂追Pac-Man或Pac-Man追鬼魂嘅情況。另外，套裝同時附送一個Lego人仔玩《食鬼》嘅迷你場景。

「PAC-MAN Arcade 10323」售價為$269.99美元（約$2,100港幣），預計2023年6月4日正式發售。