無論係外國電影《孤疑 (Orphan)》，又或者由郭富城主演，留下名對白「我又諗起你老婆啦」嘅《殺人犯》，個故事重心都係一個患有「不老症」而且性格極有問題嘅「兒童」，試圖謀害收養佢嘅家庭，而相信大家當年睇戲時都會心諗「有冇咁荒謬呀？」但原來現實中真係有啲咁荒謬嘅事。美國一對夫婦就曾經收養咗一名「六歲女童」，但隨後就發現佢行為怪異，更有可能係個廿幾歲嘅成年人黎。

Natalia Grace Barnett

卻說來自美國Indianapolis嘅Michael及Kristine Barnett夫婦，於2010年本住「做好事」嘅心態，去到相關機構希望收養一個孤兒，而佢哋就遇到一名出世紙上寫住出生於2003年9月4日，時年6歲、僅高三尺嘅烏克蘭女童。Michael Barnett表示收養女童時就知道佢患有「先天性脊椎骨骺發育不良」，簡單黎講就即係「侏儒症」嘅一種，但「無質疑佢係咪六歲嘅理由」，所以夫婦二人最終都收養咗個女童，並為其取名Natalia Grace Barnett。

但怪事由一家人返到屋企就開始。據Michael憶述，當時一行人回到家中後，太太Kristine就為Natalia沖涼，但就驚訝地發現Natalia已經長出恥毛，不久後又於Natalia嘅房間內發現有血跡嘅內褲，顯示佢身體已經發展成熟。而對於夫婦二人嘅問題，Natalia就表示自己的確有月經，但就一直隱藏。

其後Natalia嘅行為越見怪異。除咗會於車內大小便外，更會將大便塗抹於房間窗戶上。Michael更表示Natalia會為咗得到大家注意而「開門跳出車外」，「目的係令自己睇落似一個可憐、無助嘅小女孩」。Michael亦指出Natalia會收集家中嘅刀具，更曾對其明言「我會襯你睡著時殺了你」，結果有一次佢半夜紮醒時真係發現Natalia手持利刀站在自己床邊。Michael亦指控Natalia曾在咖啡中加入清潔劑嘗試毒害太太Kristine，又曾威脅會刺傷二人嘅親生兒子Jacob。

Barnett一家合照

2002年時Natalia曾入住當地嘅精神病院，院方將佢判定為「反社會人格 (Sociopath)」，最後更因為「對男病人作出不適當的性言論」而被逼出院，更令Barnett夫婦相信佢並非一名「女童」。同年Barnett夫婦成功向當地法庭申請，將Natalia嘅出生日期改為1989年9月，換言之只少從法律上而言，Natalia當時已經係一名23歲嘅成年女子。

及後夫婦為Natalia搵咗另一間屋，並一度為其交租。而據Natalia嘅新鄰居指，Natalia嘅於眾人，包括小朋友前嘅「色情行為」令佢哋感到擔憂。同時一名鄰居亦曾因為Natalia跟蹤其母親而報警，表示「佢想殺害我媽媽」。

後來Barnett夫婦離婚並搬到加拿大，Natalia亦失去金錢上嘅緩助，屋企一度停水停電、依賴食物銀行救助。於是有關機構介入，為其尋找暫托家庭，並安排社工幫助。亦係呢個時候，Natalia向當局指控Barnett夫婦「遺棄」佢，而當局最初亦表示，雖然Natalia為「成年人」，但因為病情，Barnett夫婦依然有責任照顧佢，所以控告Barnett夫婦「疏忽照顧受養人」。但法庭於2022年裁定Michael Barnett罪名不成立，而對太太Kristine Barnett嘅指控就被撤銷。

而Barnett夫婦及Natalia嘅故事，最近就被Investigation Discovery拍成紀錄片集《The Curious Case of Natalia Grace》。

資料來源：Insider