自從AI圖片生成技術漸漸流行後，世界各地嘅人都搵到不同嘅有趣使用方法，其中日本網民就非常鍾意利用AI將動漫角色真人化。近日有網民就於「5ch」上分享咗佢利用AI技術將《名偵探柯南》角色真人化嘅結果，當中有靚女到爆嘅灰原 (大人版)、個樣古古惑惑嘅柯南，但最令人「驚喜」嘅就係小蘭，不過唔係AI真人化後嘅佢有幾靚女，而係佢頭上嗰隻享負盛名嘅「角」。

作為作品嘅女主角，小蘭嘅賣點除咗極為溫柔嘅性格、堪比超級撒亞人嘅戰鬥力之外，就要數到佢嗰個好似頭上生咗隻角出黎嘅奇特髮型。歷年黎唔少人都嘗試於現實中重現佢個髮型，但通通都失敗收場。有趣嘅係，當日本網民將小蘭嘅相利用AI真人化後，佢隻「角」竟然同背景中嘅鋼架融為一體，變咗工字鐵建構，其他網民見到張圖都笑稱，連AI都理解唔到小蘭個髮型。

而除咗小蘭之外，5ch網民亦將柯南、新一、灰原、小五郎，新一嘅爸爸媽媽等角色放哂入AI進行真人化。結果唔單止灰原同新一媽媽變哂做大美人，連毛利小五郎都變成型佬一個。

資料來源：5ch