或者係我識得人少，但我身邊所有鍾意儲文具嘅朋友通通都係女仔黎，而市面上販售嘅「靚文具」，通常亦係面向女性客群——我會用「通常」，就即係有例外啦！好似之前都同大家介紹過嘅 A.T.FIELD EVANGELION WORK，最新就推出能夠令男仔都成為文具控嘅美工刀同墊板！

A.T.FIELD EVANGELION WORK為《EVA》官方商店「EVA STORE」推出嘅工業風品牌，早期亦的確係以工作服、圍裙、工作架、照明燈、「辣雞」等一般人買完都唔知用去邊嘅工業用產品為主，不過近來佢哋就出多咗衫褲鞋襪、背包揹袋等比較「日常」嘅用品。而最新推出嘅就係兩把分別以初號機及貳號機為主題嘅美工刀，以及兩款A3大小嘅墊底板。

其中兩把美工刀係與日本著名美工刀品牌「OLFA」合作推出，整體線條非常硬朗，分別用上初號機及貳號機配色，正面有A.T.FIELD嘅標認，背面就有NERV標誌，兩側就分邊寫上機體名稱。至於墊面嘅正面除咗有尺吋及輔助格之外，仲有大大個NERV標誌以及A.T.FIELD嘅裝飾。不過最大賣點其實係背面，有貳號機全身像再加上大量EVA風警告標示。美工刀售價為1,650Yen (約HK$90)、墊板就係2,970Yen (約HK$165)。EVA STORE上有售。

資料來源：EVA STORE