如果大家去過日本旅行，都知道電子付費於當地未算盛行，好多時都要靠現金交易，加上商家標價時好鍾意定99Yen、98Yen嘅尾數，結果就係每晚返到酒店你都剩返一大堆散銀，有時仲要想喺汽水機用咗佢、結果汽水機都唔收。而近日有日本網民於Twitter上分享咗一個神社告示，顯示原來神社香油箱都唔收1 Yen硬幣，結果引起熱議。

お賽銭に通貨としての価値以上の意味がないことが明記されていて良い pic.twitter.com/UBBT9A2a3h

— hideo54 (@hideo54) June 25, 2023

卻說日本網民「Hideo54」日前於Twitter分享咗一張日本神社香油箱 (賽錢箱) 嘅照片，可見箱上放有一個告示，用紅色字寫明「請大家不要用1 Yen硬幣作香油錢」，下面用較小嘅字體解釋：「入1 Yen硬幣去銀行會被收取超過1 Yen嘅手續費，令你嘅香油錢變得沒有意義」。對此Hideo54留言嘲諷：「寫到明香油錢除咗『錢』之外無其他意義真係好」。

據日本媒體報導，日本各大銀行於2019年起開始對處理大量硬幣收取手續費，去年連更為平民嘅郵局銀利亦跟隨。目前銀行手續費大約為「每1,000個硬幣收1,100 Yen」，換言之如果1,000個都係1 Yen硬幣嘅話，存戶其實係要倒貼。

日本1 Yen硬幣

圖片：WIKICOMMON

日本網民對於呢個告示嘅反應就頗為兩極。有人認為神社嘅香油錢本來就唔使交稅，而且更有善眾嘅心意等意義，所以神社唔應該「揀香油錢黎收」，甚至有人狠嘲：「咁唔鍾意你去求神嘛！」、「神都要受資本主義限制呀？」。但另一邊廂，有人就指出絕大部份香油錢都係用返喺修繕神社之上，並唔係入咗某人嘅袋，所以神社作出告示的確唔係想「賺到盡」；亦有人同意1 Yen、5 Yen硬幣有如「被詛咒」一樣根本用唔到，神社告示只係證明1 Yen、5 Yen應該被取締。

對此，日本媒體《J-CAST》就去訪問著名嘅東京王子稻荷神社，神社負責人表示，香油錢係神社用作修繕嘅重要資金來源，所以如果因為銀行手續費而出現負數，對佢哋影響非常大，雖然收到能夠收到善眾嘅心意，但啲錢就完全用唔到。佢哋更表示暫時無考慮過要推行電子香油錢。

資料來源：J-CAST