只要你係有返咁上下年齡嘅機迷、有玩過紅白機又或者Game Boy等卡帶式遊戲機，咁你好可能試過因為部機讀唔到盒卡而用嘗試用口吹吹佢，好神奇嘅係呢個方法又真係有用。時移世易，近年打機連隻碟都唔再係必須，但似乎有部份玩家依然改唔到用口吹嘅壞習慣，搞到任天堂都要出文提醒大家。

ゲームカードスロットの中にホコリが入ってしまった場合は、掃除機で吸い出してください。
※息を吹きかけるなどの行為はしないでください。唾液が端子部に付着し、部品のサビや腐食の原因となる恐れがあります。

— 任天堂サポート (@nintendo_cs) June 30, 2023

卻說任天堂目前最新主機Switch嘅實體遊戲，均以SD卡嘅形式發售，換言之主機上會有個卡糟，而玩家們亦需要進行「插卡」呢個動作。而唔知係咪近來好多日本玩家嘅卡糟都出現故障，所以日本任天堂近日就於Twitter出文，提醒玩家唔好嘗試用棉花棒去清潔卡糟，亦唔好將損毀咗嘅遊戲SD卡插入去，以免損害卡糟內嘅金屬接口。

本來呢個提醒就冇咩特別，但帖文發佈後，好多日本網民都留言表示卡糟有塵的話用口「呼呼」吹就可以。於是任天堂再回覆帖文，表示用口吹的話可能會將口水吹進卡糟，造成生鏽或者腐蝕，所以最好嘅方法係用吸塵機吸返啲塵出黎。

其實早於十幾年前就已經有遊戲媒體提醒玩家唔好用口吹卡帶，除咗如任天堂所說口水及濕氣可能會引致卡帶生鏽外，更重要嘅係主機未能讀取卡帶，好多時係因為接觸不良，所以「掹出黎插返入去」呢個動作本身就已經足夠，用口吹其實冇任何作用。