宮崎駿最後一部電影《你想活出怎樣的人生》將於兩日後正式上映，但到目前為止官方都冇公開任何劇照、故事大綱或預告片。而且為咗防止劇透，發行商更宣布會延遲發售電影場刊，令影迷相當好奇。

日本大部份中型及大型戲院都會設有禮品店，出售當時正在上映嘅電影周邊商品及場刊（パンフレット），例如文具，figures及迷你海報，而場刊更會收錄電影宣傳照、幕後花絮、製作人員訪問等內容，令觀眾能夠深入了解電影製作過程及留作紀念。不過，電影發行商東寶日前就破天荒地宣布，《你想活出怎樣的人生》不會喺開畫期間出售場刊，留待日後透過郵寄方式發售。雖然東寶未有提及具體原因，但相信咁做係為咗防止觀眾劇透、將場刊內嘅劇照曝光到網上，秉持吉卜力保持神秘感嘅決心。

《你想活出怎樣的人生》為宮崎駿睽違十年復出之作，同時亦好大機會係封鏡之作，然而一部咁重要嘅作品，吉卜力卻採取「零宣傳」策略，唔事前公開任何劇照、預告片、劇情大綱及聲優陣容，僅曝光一張手繪海報就直接上畫。吉卜力三巨頭之一嘅鈴木敏夫早前就解釋，咁做係為咗保持神秘感，令觀眾更加期待。電影將於7月14日於日本率先上映，香港方面就暫時未有消息。