上月初時我哋同大家報導過，終於有玩家抽中由著名集玩式卡牌遊戲《Magic: The Gathering》與《Lord of the Rings》合作推出嘅卡組中，全球唯一、估計值200萬美金嘅「至尊魔戒卡」。近日抽中該卡嘅加拿大卡鋪店店員Brook Trafton就終於成功將「至尊魔戒卡」賣出，而個買家，就係著名歌手Post Malone！

雖然現年28歲嘅Post Malone滿面紋身，睇起黎有啲凶神惡煞，但其實佢性格有如一個大細路，同時亦係一個著名宅男，曾多次公開表示自己對Pokemon系列以及《MTG》嘅熱愛。例如2021年4月時，佢就無懼疫情影響，親自參加於美國加州舉行嘅卡牌展，純粹就係為咗入去買卡；去年佢又以創紀錄嘅80萬美金，買下《MTG》中嘅稀有卡「Black Lotus」。黎緊仲會同美國卡牌交易平台合作，親自落場同玩家交量，玩家贏到佢就可以獲得10萬美元獎金，可見佢對系列嘅熱愛及支持。

在 Instagram 查看這則貼文

Joshua Brook（@brook4129）分享的貼文

日前，加拿大卡牌店員Brook Trafton透過社交媒體，公開自己就係「至尊魔戒卡」嘅「中獎者」，同時上傳影片，表示已經將卡賣畀Post Malone。從片中可見，Post Malone先係將張卡拎上手睇咗一睇，然後露出燦爛笑容說道：「Yeah, I'll take it」，隨後與感動流淚嘅Brook Trafton相擁。

Brook Trafton於帖文中表示，雖然自己由細玩《MTG》到大，其實好想保留「至尊魔戒卡」，但如果能夠賣咗張卡，對自己嘅人生影響更大，所以佢希望能夠將張卡賣畀真正識欣賞嘅人。同時佢亦係Post Malone嘅Fans，所以當佢抽到「至尊魔戒卡」時，第一個諗起嘅人就係Post Malone。佢表示能夠親自見到Post Malone與其「交收」，係「如童話故事」嘅時刻，亦多謝Post Malone及《MTG》改變咗佢嘅人生。

據知除咗交收之外，Post Malone仲追蹤咗Brook Trafton嘅IG。而成交價方面，大部份媒體估計都係200萬美金 (約HK$1,600萬)，亦有人估計為260萬美金 (約HK$2,000萬)。

資料來源：BBC