作為《名偵探柯南》嘅女主角，毛利蘭 (小蘭) 嘅女友力、戰鬥力一直都係Fans們討論嘅話題，但更出名嘅就係佢嗰個連AI認錯嘅奇特「獨角」髮型。過往Fans們一直認為小蘭個髮型於現實中根本不可行，甚至有人笑稱佢真係一隻角黎。但近日有個日本髮型師，就真係於現實還原出小蘭嘅髮型！令網民驚味「原來真係Gel到出黎！」

日本髮型師「さとけんHair Labo (@SatokenHairLabo)」過往一直創將二次元角色嘅髮型帶到三次元世界嘅影片，過去就曾經重演過《龍珠》悟空個超級撒亞人頭、《遊戲王》中武藤遊戲個…我都唔知點形容嘅頭，以及大量《JoJo》角色嘅奇特髮型。對比之下，其實今次重現小蘭隻「角」已經算係相當簡單。

據佢於影片中嘅解說，要重現隻角嘅要點，在於要大量增加髮量。佢表示正常人嘅頭髮太柔軟亦太「稀疏」，所以根本撐唔起隻角嘅重量。為此佢先幫假人頭加入大量髮片，特別係隻角「生」出黎嘅位置更加要大幅「加固」，增加頭髮厚度。隨後就係按小蘭嘅髮型修剪其他位置。值得留意嘅係，要Gel得出隻角，小蘭個頭頂本身就要多出一大把頭髮，就算未Gel都已經頗為奇特。

最後嘅步驟，就係用大量髮膠、定型噴霧將隻角定型，同時要用密齒梳不停反向梳隻角，令結構更加堅固，最後再補上定形水慢慢修出個尖端。從影片中可見，去到後期隻角真係已經硬繃繃，連紙巾都可以直接篤穿。如果大家都有興趣Gel呢個小蘭頭，就可以去「さとけんHair Labo」個YouTube到慢慢學啦。