DC首部拉丁裔超級英雄片《Blue Beetle》（藍甲蟲）上周正式開畫，首周末3日於北美收獲2,540萬美元票房，而海外則收獲1,800萬美元，全球票房合共4,340萬美元。雖然《Blue Beetle》開畫票房低於業界所預測嘅3,000萬美元（北美），甚至係DC近十年嚟第二差開畫成績電影（第一係疫情期間上映嘅《Wonder Woman 1984》，1,670萬美元），但成功將蟬聯4周票房冠軍嘅《Barbie》推落第二，成為上周末最賣座電影。

除此之外，目前電影評價普遍都唔錯，Rotten Tomatoes上分別獲得77%新鮮度（影評人評分）及92%爆米花指數（影迷評分），唔少人都稱讚主角Xolo Maridueña表現出色、情感刻劃細膩，以及對拉丁文化有深入了解。據了解，《Blue Beetle》製作成本為1.04億美元，若然之後可以靠口碑吸引更多觀眾入場，再加上龐大嘅拉丁裔族群支持，最終未必會蝕本收場。

《Blue Beetle》由Ángel Manuel Soto執導，故事講述剛從大學畢業嘅Jaime Reyes（Xolo Maridueña 飾）回到家鄉，本希望可以一展抱負，卻發現老家已經今非昔比。正當佢摸索緊人生目標時，意外被外星生物科技「聖甲蟲」選為宿主，繼而獲得超能力盔甲成為新一代藍甲蟲，命運從此改寫。