麥當勞嘅薯可以話係大家細個時最渴望嘅美食，就算長大成人、市面上又多咗選擇，唔少人都仲係對「M記薯條」念念不忘，聞到陣味就開心。如果你自問都係M記薯條嘅資深Fans，咁你睇到以下呢個「麥當勞薯條香薰」或者都會好興奮！

話說日本麥當勞日前於官方X (Twitter) 發文，話自己整咗個「散發炸薯仔香味嘅香薰」，而從圖中可見，呢個香薰嘅外形都明顯參考咗M記薯條嘅包裝設計，本體為紅色再加上黃色M字標誌，頂部有一個木製蓋子，而「散香棒」就造成薯條嘅模樣，的確令人睇圖到就諗起薯條陣香味。

揚げたてポテトの香りのアロマディフューザーを作りました。#アイラブポテト pic.twitter.com/AZ7ZmlXCWG

— マクドナルド (@McDonaldsJapan) August 19, 2023

帖文一出就廣受日本網討論，唔少人都話想買、小朋友一定好鍾意，亦令帖文獲得近1000萬次觀看、超過7.7萬個讚好。不過芸芸眾多留言之中，獲得最多讚好嘅就係話「我隔離個大叔都係呢陣味」。

可惜 (?) 嘅係，日本麥當勞於圖中最底寫明，呢個「薯條香薰」只係一個概念，目前無真正製造、販售嘅打算。所以如果大家真係好想聞薯條香，就要親自去幫襯啦。