由井上雄彥老師創作嘅輪椅籃球漫畫《REAL》，自1999年推出後一直都有一班忠實Fans，但漫畫嘅連載亦一直斷斷續續，2021年7月更宣佈無限期休刊，不過井上雄彥老師忙完《THE FIRST SLAM DUNK》之後，終於有時間繼續創作《REAL》，而《週刊Young Jump》亦宣佈連載會於黎緊嘅2023年39號中再開！

圖片：週刊Young Jump

《REAL》雖然以輪椅籃球作為主題，作品名稱其實亦係輪椅英文「Wheel」嘅諧音，但實際內容更多講述戶川清春、野宮明美以及高橋久信三名年青人面對生活各種難題，「(輪椅) 籃球」更多只係佢哋面對問題嘅其中一個方法，所以情節較為成熟、沉重，相比於《SLAM DUNK》當然亦冇咁青春熱血，口味算係比較小眾。但呢種風格同時亦吸引到一班追求情感深度嘅讀者，所以讀者群雖小，作品口碑卻一直都唔錯。

圖片：週刊Young Jump

《REAL》自連載開始就採用不定期更新，大約每兩個月先會更新一話，每話大約32頁，所以即使連載咗24年，到目前為止都只係連載到第93話、出咗15本單行本。近年完成《THE FIRST SLAM DUNK》後，井上雄彥老師有講過會回歸《REAL》嘅連載，睇黎今次連載再開就係佢努力嘅成果。

另一邊廂，井上雄彥老師其實仲有部以宮本武藏為主角嘅《浪人劍客》。《浪》由1998年起於《週刊Morning》上連載，中途經歷過幾次以年計嘅休刊，井上雄彥老師曾表示2010年內就會畫出結局，但結果「走數」之餘，更於2015年再次宣佈無限期休刊，直到依家都冇再更新。