日本格鬥遊戲 (主要係《街霸》啦) 中有所謂「格鬥五神」，亦即五位多年都維持高水準、贏過好多比賽嘅格鬥遊戲玩家，分別係大家都非常熟悉嘅「Daigo」梅原大吾、以絢麗連技聞名嘅「Sako」、目前仍係爭標份子嘅「Tokido」、2017年引退嘅「Nuki」大貫晋也以及早前憑「現代模式」春麗打入EVO前六嘅「Haitani」。

縱然五人於日本格鬥界地位崇高，但Haitani日前竟然被人串佢「淨係識跳」，結果佢唔單止冇嬲，仲露出一幅「爸爸微笑」！

仕事中に部屋に乱入し、ジャンプを繰り返す父親に対して
「うわ！ジャンプだけじゃーんパパｗｗ」
と煽ってくる三歳児は相当センスがある。 pic.twitter.com/Pd1gDUggYM

— RC ハイタニ(Haitani) (@hai090) August 21, 2023

原因就係串佢嗰個，就係佢個三歲寶貝女！Haitani日前於X 發佈咗一條直播精華，當時玩緊《Street Fighter VI》嘅佢選用「蘇聯佬」Zangieff對上今集新角色「Jamie」。期間無論係使出「旋風撻」、尋找進攻機會、又或被人打飛時，Haitani隻「蘇聯佬」都多次「跳起」。結果喺隔離睇住老豆打機嘅三歲女就講咗句「唉，淨係識得跳~」引到Haitani大笑。

自分で結構やってて詳しくなってるからタチが悪い笑

— RC ハイタニ(Haitani) (@hai090) August 22, 2023

Haitani於帖文中表示，「亂入工作房間，嘲諷爸爸『唉，淨係識跳架！』呢個三歲女幾醒目呢！』展現出爸爸對女兒嘅寵愛及無奈。但事實上Haitani比個女串，其實算係自己攞黎。事關另一位日本知名格鬥玩家「Fuudo」個老婆、前寫真女星倉持由香睇完條片後留言「嘲諷力很高呢」後，Haitani回覆道：「我自己都成日咁講嘢，所以好清楚咁樣有幾衰呢！」

呢個故事教訓各位爸爸，喺啲小朋友面前唔好亂講嘢呀！