便利店素來係香港人去日本時必到嘅「景點」之一，而香港冇嘅Family Mart就更係大家「唔買都入去行下」嘅好去處之一。近日日本Family Mart更會與「酒的美術館」合作，將一間位於明治通嘅分店「改建」成酒吧，仲會推出專為配搭「Family Mart名物」炸雞扒而設嘅「Family Mart雞扒Highball」，大家又多個理由去Family Mart啦！

日本嘅「酒的美術館 (お酒の美術館)」旨在於便利店、超級市場、車站及機場等地方設置簡單酒吧，希望推廣飲酒文化，其目標係於2030年前，於日本各地設置1,000間店鋪。而近日佢哋就同Family Mart合作，於涉谷站南口附近嘅Family Mart明治通店設立東京首間Family Mart「店中店」。

明治通店將會提供各類日本及海外威士忌及白蘭地，當中部份為市面罕見嘅停產及稀少品，而且通通都係500Yen一杯，亦唔會另外入座費，可以話係經濟、實惠、方便地品嚐各種美酒嘅好去處。

既然同得Family Mart合作，當然就唔會淨係用咗佢哋個地方咁簡單。明治通店容許客人於Family Mart選購心儀小食之後先入座，同時亦會推出專為配搭「Family Mart雞扒」而特調嘅Highball，提供另一種層次嘅享受。如果大家去開東京嘅話，都可以體驗一下啦。

資料來源：PRTIMES