喺日本，用ACG人物黎做宣傳並唔係咩新鮮事，甚至各大少縣市都會同不同嘅ACG作品合作，希望增加知名度同吸引遊客。例如上個星期介紹過嘅宇部市「朗努基斯之槍」企劃就係一個好例子。而除咗宇部市之外，位於奈良縣嘅橿原市，早前亦推出咗同《Street Fighter》合作嘅特別車牌，仲引來「超額認購」，有望加推！

卻說橿原市係Capcom創辦人兼CEO「辻本憲三」嘅家鄉，而為咗幫手宣傳，Capcom早於去年就於橿原市合作，推出一系列同《Street Fighter》有關嘅聯乘，例如當地大和八木車站前就放咗個「隆 (Ryu)」嘅全身銅像，今年內亦會有「春麗」銅像落成。

而今年7月時，橿原市宣佈再次與《Street Fighter》合作，推出兩款《Street Fighter》主題車牌，分別為較為現代嘅水墨風隆背影，以及經典嘅《Street Fighter II》「波動拳」。兩者一經公佈後就引起《Street Fighter》粉絲們注意，甚至唔少外縣市居民都話想要。

而據《朝日新聞》日前報導，呢兩款原定只推出260個嘅特別車牌，於8月開放預訂後，收到接近600份申請，超額認購一倍以上；而「波動拳款」中專為125cc二輪機車而設嘅粉紅色底版本，原定推出20個，最後有122人申請，超額認購6倍！可見車牌嘅受歡迎程度。目前橿原亦考會加推車牌。

值得一提嘅係，近600份申請當中，有超過6成都係來自40-50歲嘅中年族群。一方面係因為呢個年齡大概就係當年玩過《Street Fighter II》嘅人，另一方面亦係去到呢個歲數先會有車、有錢、有心機去申請特別車牌。

資料來源：朝日新聞