早前我哋都同大家介紹過，目前漫畫界除咗有日漫、美漫等源自書刊式閱讀嘅作品外，更有源自韓國、更方便手機平板閱讀嘅「條漫」作品。而近年「條漫」嘅影響力越黎越大，甚至連日漫龍頭集英社早前都正式開設條漫平台。不過近日日本著名創業家「堀江貴文」就於電視節目上批評日本漫畫界發展落後，更揚言「《鬼滅之刃》嘅成功係日本漫畫期嘅失敗」！

圖片：Wikipedia

堀江貴文上月尾於東京電台節目《TOKYO SPEAKEASY》，並於另一名嘉賓，漫畫家東村明子一齊討論日本漫畫嘅未來發展。而堀江貴文劈頭就話「我認為《鬼滅之刃》令日本漫畫落後了十年。」、「《鬼滅》當然是一部好作品，但其成功為『Japan System』續命」，而東村明子亦表示認同：「日本出版商會認為『Japan System』仍然能夠賺錢。」而隨住條漫越黎越盛行，堀江貴文指：「我認為日本漫畫會被一口氣超過。」

堀江貴文及東村明子提到嘅「Japan System」，其實就即係大家熟悉嘅書刊揭頁式、右至左，上至下閱讀、而且係黑白分格嘅傳統漫畫。相比之下，條漫只由上至下閱讀，而且通常為彩色。而堀江貴文似乎認為彩色漫畫更受大家喜愛：「某本雜誌上有以我為題的 (傳統) 漫畫，但當我將漫畫分享到IG上時，只得到非常少的讚好。但我與某個大叔的自拍相得到的讚好卻是以倍數計，就是因為漫畫是黑白色！」

事實上日本漫畫業界對於條漫的反應的確十分緩慢，當大量韓國條漫都已被改編成電視劇、電影並大為流行之時，集英社於今年5月先正式成立條漫平台「Jump Toon」，仲已經係最早進入條漫市場嘅日本大型出版商。至於未來傳統漫畫與條漫究會相輔相成，各自找到生存空間，定係某一方被完全取代，可能就要留待時間去證明。

資料來源：Sponichi Annex