最近一款名為《西瓜Game》（スイカゲーム）嘅休閒遊戲喺日本突然爆紅，備受各大VTuber及實況主歡迎，人氣歌手Ado亦玩到唔願瞓覺，究竟呢隻Game有咩魅力呢？

據了解，《西瓜Game》（スイカゲーム）由日本投影機公司Aladdin X開發，起初只係投影機嘅內建小遊戲，其後於2021年12月登陸Switch平台發售。遊戲概念就好似幾年前好流行嘅《2048》，玩家將隨機獲得唔同嘅水果，並按個人策略將水果放入箱內，當兩款同類嘅水果碰撞時就會自動合成出更大嘅水果，最終目標就係合成出最大嘅水果「西瓜」。

雖然相關概念嘅遊戲老早就有，但隨住各大知名VTuber直播推廣，再加上畫風有趣可愛，遊戲火速登上日本Nintendo eShop熱銷榜冠軍，下載量甚至突破100萬次，營收高達2.4億日元，就連搞笑藝人SEIYA （せいや）、人氣歌手Ado亦係擁躉，Ado仲話自己玩到失眠，成個腦都不停諗住西瓜Game。

有興趣嘅網友可以到日本Nintendo eShop下載遊玩，售價為240日元。

スイカゲームのせいで眠れなくなってるんだ スイカゲームのことしか考えられない そう、恋をしているんだ スイカに

— Ado (@ado1024imokenp) October 5, 2023