日本Bandai旗下有個叫「NARIKIRI WORLD」嘅玩具品牌，其特色就係專門推出動漫、特攝作品嘅變身、變型器具，令Fans能夠於現實中重現角色嘅經典場面。而近日NARIKIRI WORLD就宣佈會舉行「NARIKIRI WORLD 2023」玩具展，而當中最矚目嘅，就係與日本潮流服裝品牌BEAMS聯乘，推出「手提箱大炮」！

「NARIKIRI WORLD」源自1971年BANDAI為《幪面超人》推出嘅變身腰帶，隨後多年不停推出《幪面超人》以及《Ultraman》等相關週邊，近年更加入《光之美少女》、《超級戰隊》，以至《數碼暴龍》、《遊戲王》等作品中嘅變身玩具，發展成一個完整嘅「變身玩具」品牌。而黎緊10月20-22日於秋葉原UDX 2F舉行嘅「NARIKIRI WORLD 2023(なりきりワールド 2023)」，就會展出過百款旗下玩具，供Fans們近距離觀賞。

而展覽更會以「你未見過的變身玩具」為題，與日本服裝品牌BEAMS合作推出由手提行李箱變身而成嘅「BEAM炮」。據官方新聞稿指，「BEAM炮」嘅設定為「2XXX年，出現一間吸引到全宇宙所有生物到訪嘅潮流商店『BEAMS in Space』，而該店的最新商品，就係一個可以變身成大炮嘅白色行李箱。雖然乍看之下好普通，但店長話係可以用黎對付狂暴太空生物嘅致命武器。」而從公開嘅漫畫風解說圖中，亦可以見到「店長」將手放上行李箱之後，行李箱會打開並變身一個二聯炮台。

至於實物究竟如何，或者就要等到展覽開始後先會知啦。

資料來源：PRTIMES