由劉偉強和麥兆輝擔任執導╴周杰倫、陳冠希、黃秋生、余文樂、杜汶澤、陳小春及鍾鎮濤等人主演嘅2005年電影《頭文字D》上映後叫好叫座，電影中嘅多句對白例如「3萬蚊，過夜，你條女係雞呀」亦成為香港人熟知嘅金句，多年黎亦一直有傳或會開拍續集，但就一直得個「傳」字。事隔將近20年，近日有報導指將會有一部新嘅《頭文字D》開始製作，但就唔係大家意料之中嘅續集，而係《Fast & Furious》系列中嘅「韓哥」姜成鎬執導嘅獨立作品。

姜成鎬

「韓哥」執導嘅《Shaky Shivers》

日前「韓哥」姜成鎬為咗宣傳佢首次執導嘅獨立恐怖喜劇《Shaky Shivers》而接受《南華早報》訪問，期間就談到佢嘅未來執導計劃。佢表示目前正準備開拍兩部電影，其中一部以其童年為靈感、故事圍繞一個位於美國佐治亞州嘅多族裔家庭，並且會係佢目前嘅首要任務，「呢部比較趕急，因為我想趕得切拍出黎讚揚我爸爸，而佢近年身體唔太好。」

至於另一部電影，就係《頭文字D》。據「韓哥」表示，佢呢部《頭文字D》與香港嗰部《頭文字D》無關，純粹都係改編自同一部漫畫咁解。佢亦表示電影係關於「車呀、飄移呢啲有趣嘢，幾乎會似《Rocky》或者《Karate Kid》，係一部有趣、展示出我對汽車熱愛嘅高成本大片。」

「韓哥」並無透露兩部電影目前嘅進度，但考慮佢打算先拍自己嘅童年故事，相信距離「韓哥版本」《頭文字D》面世都仲有一段時間。

資料來源：南華早報