Ryan Reynolds及Hugh Jackman兩位好友於現實中嘅互動可謂「基情無限」，而二人於拍攝中嘅《Deadpool 3》中似乎亦繼續「恩愛」。《Deadpool》系列導演Shawn Levy近日接受訪問時，就表示二人因為「深愛對方」，所以於《Deadpool 3》不停希望自己嘅角色輸畀對方，而非好似當年Vin Diesel及Dwayne Johnson拍攝《Fast 8》咁要求「永遠打和」。

Shawn Levy日前登上《The Jess Cagle Show》接受視像訪問，期間節目主持人Julia Cunningham就問到佢點樣處理Ryan Reynolds以及Hugh Jackman兩位巨星於《Deadpool 3》嘅角色高低問題，並引用當年Vin Diesel及Dwayne Johnson拍攝《Fast 8》時，於合約上就寫明二人「咁高咁大」，結果二人於電影中「打咗20分鐘都係打和，睇到人一頭霧水」。

Shawn Levy就回答：「點解我咁鍾意Ryan及Hugh，係因為佢哋兩個都係非常平易近人、善良大方嘅人。而對我黎講，拍攝《Deadpool 3》最幸運嘅，就係佢哋深愛著對方。Hugh係Ryan嘅狂粉，而Ryan深知搵到Wolverine共演嘅機會難得，所以兩個人都不停搵方法捧對方個角色贏。而Ryan作為編劇及製作人之一，總是驚訝地想Deadpool輸。佢總係以『點樣令故事變得更好』嘅角度出發，而唔係『佢打我幾多拳我就就要打返佢幾多拳』。而作為觀眾，能夠見到一次過見到兩位巨星，以佢哋最經典嘅角色出演，係非常美妙嘅事。」

另外節目主持人Jess Cagle亦單刀直入地問Taylor Swift是否會出演《Deadpool 3》。而Shawn Levy就笑言：「我鍾意大家對選角嘅傳聞越吹越大，咁我就唔使真係去答邊啲係真嘅，邊啲係大家嘅幻想。所以目前我會好老土地對所有選角傳聞回答『無可奉告』。」不過隨住兩位主持人進一步追問，Shawn Levy最後都稍為鬆口：「好多網上傳聞係完全錯嘅，但有啲係真嘅。」