荷里活著名飛車動作片《Fast & Furious（狂野時速）》系列，向來積極邀請各大動作影星加盟，藉此製造話題，例如The Rock、Tony Jaa、John Cena以及最新嘅Jason Momoa。而最近就有報導指，其實90年代著名動作巨星尚格雲頓（Jean-Claude Van Damme）曾有機會出演《Fast & Furious》系列，但因為主演兼監製Vin Diesel從中作梗，所以未能成事。

尚格雲頓日前接受《The Daily Telegraph》訪問時表示： 「佢哋(環球影業)希望我出演《Fast & Furious》，但由於Vin Diesel表示『NO，我唔想搵佢。』」導致合作破局，但尚格雲頓未有透露環球係想搵佢出演邊一集，以及邊一位角色。

事實上，曾於動作片界風靡一時嘅尚格雲頓精通各種武術，其硬漢形象又非常符合《Fast & Furious》系列，唔知Vin Diesel點解會拒絕，有網民就猜測可能係尚格雲頓工作態度出晒差（e.g. 曾於片場吸毒耽誤拍攝），亦有可能係Vin Diesel唔希望被搶去風頭。