由Denis Villeneuve執導嘅2015年犯罪驚慄片《Sicario（毒裁者）》，以美國政府掃毒行動及墨西哥販毒集團為背景，講述一名FBI女探員與兩位三角洲特種部隊成員跨越美墨邊界追緝國際毒犯，深入探討毒品戰爭嘅黑暗面及道德困境，再加上出色嘅攝影及氣氛營造，大受影迷歡迎。其後更於2018年推出續集《Sicario: Day of the Soldado（毒裁者2：無法無天）》，但因為換咗導演以及Emily Blunt並未參與演出，所以評價不如首集。事隔多年，《Sicario》系列監製日前就表示目前正籌備《Sicario 3》，而首集三位主演亦有望全數回歸。

《Sicario》系列監製Molly Smith及Trent Luckinbill日前為宣傳Netflix新作《Reptile》接受外媒《Collider》訪問時，提到《Sicario 3》最新進度及選角方向：「我哋有一個好優勢嘅故事想講，希望Benicio Del Toro、Emily Blunt以及Josh Brolin三人能夠再次重聚...由於Benicio Del Toro最近先同我哋同合作過，所以佢可能係最接近呢個項目嘅人，我哋亦聯繫緊每位工作人員，大家都一直密切關注呢個項目。」

話雖如此，但Emily Blunt同Josh Brolin都係大忙人，未必能夠抽空參演拍攝，前者係荷里活大片炙手可熱嘅合作對象，而後者則係Apple TV+劇集《Outer Range》主演。當然啦，如果三位確實有意回歸，相信製作團隊都會搵到方法解決嘅，期待官方嘅好消息。