隨住任天堂Switch推出六個年頭，加上Xbox及PS都於近年分別推出新世化主機，所以唔少人都估計任天堂將於近期發佈Switch嘅後繼機。而近日有外國傳媒發現任天堂申請咗一個新嘅主機設計專利，頓時引起「Switch 2」可能如3DS一樣為「雙芒」設計嘅猜想。

任天堂Switch

任天堂3DS

據外國媒體《Gamerant》報導，任天堂日前申請咗一個新嘅主機設計專利。從申請文件中嘅示意圖可見，新主機嘅設計與當年嘅3DS十分類似，都係橫向對摺。打開後有上下兩個螢幕，下半部份有控制桿及L R掣，而上半部份除咗有另一個螢幕外，背後仲有一個觸控螢幕，方面用家於主機冚埋後亦可作某程度控制，邏輯與目前嘅「摺機電話」相當類似。

更特別嘅係，專利文件指主機上下兩個螢幕係可以分離，並以無線技術連接，換言之可以兩個人同時操控同一部主機。但由於「上半部份」無任何控制桿，似乎就唔係「一機二人對打」嘅用法。

由於新專利中嘅設計同3DS極為類似，有人亦猜測新主機可能會支援當年嘅3DS遊戲。值得一提嘅係，文件中似乎顯示新設計為「純掌機」，不能如Switch般外接螢幕遊玩。

但更重要嘅係，任天堂申請咗呢個專利，唔代表佢哋真係將呢個專利用於Switch 2之中。所以目前一切都只屬「看圖作文」階段，一切都要等任天堂正式公佈先會有定案。

資料來源：Gamerant