自從超級英雄電影崛起成為市場主流後，唔少荷里名導都對此大為反感，先有Martin Scorsese批評Marvel電影猶如主題公園，後有《DUNE》導演Denis Villeneuve公開批評Marvel電影只係「複製貼上」，而奧斯卡金像名導Ridley Scott更爆粗炮轟超級英雄片無聊得跟屎一樣。近日香港名導吳宇森亦就此發表個人看法，表示自己從來都唔鍾意睇超級英雄片，更喜歡Martin Scorsese個類老派真電影。

最近吳宇森為宣傳新作《Silent Night》接受《The New Yorker》雜誌專訪，被問到如何評價超級英雄片時，佢坦言自己從來都唔鍾意睇大特效電影，或者任何由漫畫改編嘅電影，更偏好觀看Martin Scorsese所拍嘅嗰種老派嘅真電影（cinema），只可惜呢類電影近年少之又少，自己亦急不及待要去觀賞Martin新作《Killers of the Flower Moon（花月殺手）》，仲話當年嘅《喋血街頭》正正就係致敬Martin Scorsese嘅《Mean Streets（窮街陋巷）》。

《喋血街頭》

除此之外，吳宇森亦談到荷里活發展嘅無奈及限制，坦言自己被片商定型只識拍動作片：「其實有好多好劇本我想拍，但呢機會從來唔屬於我。例如有一部劇情片講述一名少年喺治安好差地區長大，荷里活製作人唔會推薦由我執導，事關佢哋覺得我唔係美國人，唔了理佢哋嘅生活方式。再者，歷史劇本亦唔到我拍，因為我係華人、外國人，所以佢哋唔相信我可以拍到一部美國歷史電影。喺佢哋眼中，我只係識得拍動作片，其實我有能力拍更多唔同類型嘅電影，但實在好難說服佢哋。」

吳宇森暌違20年再戰荷里活新作《Silent Night》將於12月1日正式上映，故事講述由Joel Kinnaman飾演嘅男主角於平安夜意外捲入一場黑幫槍戰，兒子不幸身亡，而自己就喉嚨中槍而失聲，於事決定進行密集式訓練，誓要喺下個平安夜為子報仇。該片最大特色在於完全冇對白，純靠肢體語言及連場動作戲演繹整個故事。