早於2015年，曾有消息指獅門影業（Lionsgate Films）有意開拍《火影忍者》真人版電影，並鎖定《The Greatest Showman（大娛樂家）》導演Michael Gracey執導，但遲遲未有消息。正當大家以意計劃已經胎死腹中時，最近就有報導指該片已經請到編劇，由《The Witcher：Blood Origin（獵魔士：血源）》編劇Tasha Huo執筆。

隨住荷里活編劇工會早前成功以罷工行動推動業界改革，最近外媒《Variety》刊出一篇名為「2023年最值得關注的10位編劇」嘅專題報導，介紹10名編劇未來最新動向，其中女性編劇Tasha Huo就透露自己正為《Red Sonja》、《火影忍者》以及動畫版《Tomb Raider》撰寫劇本，並分享能將心愛作品搬上大銀幕嘅感想：「改編標誌性嘅角色或IP會令寫作變得更容易，因為本身已經對作品充滿寫作熱情。我深受呢啲角色啟發，所以能夠參與佢哋嘅旅程，並嘗試以引人入勝嘅方式講述一個有趣嘅故事，確實令人非常興奮。」

不過，由於Tasha Huo上一部編劇作品《The Witcher：Blood Origin》評價相當慘烈，爛蕃茄評分只有28%新鮮度，加上故事篇幅難以壓縮成一部短短一個多小時嘅電影，所以Fans們都擔心《火影忍者》最終會落得「慘遭真人化」嘅下場。