由Mark Wahlberg主演嘅2012年電影《Ted》，憑一隻搞笑麻甩嘅玩具熊講述男人間嘅友誼故事，成功以5,000萬成本斬獲5.49億美元票房，但可惜續集《Ted 2》票房表現一般，所以遲遲都未有第三集。但隨住串流平台興起，呢隻搞笑玩具熊終於可以換個形式重出江湖！

《Ted》同名前傳劇集《ted》背景設定在1993年波士頓，講述當時只有16歲嘅John Bennett（Max Burkholder 飾）同爸爸Matty、媽媽Susan 、表姐Blaire以及玩具熊Ted住埋一齊，直言不諱嘅Blaire經常同思想傳統嘅Matty發生拗撬，而玩具熊Ted就陪伴正值青春期嘅John成長，面對各種少男煩惱，預計2024年1月11日於串流平台Peacock播出，總共有7集。