自從2021年《Spider-Man: No Way Home（蜘蛛俠：不戰無歸）》橫掃全球票房後，Tom Holland已近2年冇再出現喺MCU作品，唔少Fans都好奇Spider Man續集製作進度。最近Tom Holland出席公開活動時就證實《Spider Man 4》仍然積極籌備中，並坦言自己唔會為拍而拍。

據外媒《Variety》報導，近日Tom Holland出席評論家選擇協會(Critics Choice Association)新聞發布會時表示：「我只能夠講，我哋一直積極討論緊第四部Spider Man該如何發展，以及能否搵到忠實呈現呢個角色嘅方式。我非常溺愛Spider Man，同時非常榮幸能夠參與其中，事關能夠越拍越好、越拍越成功嘅電影系列實屬罕見，所以我想好好保護呢個角色，我唔會為拍而拍，必須值得才拍。」

除此之外，Tom Holland亦表示自己仍非常熱愛Spider Man，有好劇本嘅話絕對願意回歸：「如果我地可以寫出一個好故事，而我都唔重新穿上蜘蛛俠戰衣就真係超級大傻仔，因為我一切成就都係歸功於Spider Man。我愛呢個角色，亦都愛同我一齊工作嘅人，所以我想再講一個Spider Man故事，但前提係搵到合適嘅劇本。」

由Tom Holland主演嘅MCU《蜘蛛俠》系列叫好又叫座，而且一部比一部賣座，其中第三集《No Way Home》更大收19.22億美元票房，打進影史最賣座電影第7位，三部曲合共創下近40億美元驚人票房。

資料來源：Variety、collider