Google今日公佈「2023年搜尋榜」，揭示過去一年香港人最關心嘅話題。其中年度熱搜電影榜頭三位都係本地電影，億元票房電影《毒舌大狀》更成為熱搜冠軍；而年度熱搜本地娛樂名人則由香港首位日本AV女優素海霖奪冠。

年度熱搜電影榜上除咗有《毒舌大狀》外，獲提名五項金馬獎嘅《白日之下》，以及引起一時熱議嘅《給十九歲的我》分佔二、三名，而《給》嘅導演張婉婷亦成為「熱搜本地娛樂名人」嘅第五名。連同《年少日記》(第六位)、《風再起時》(第十位)以及連續兩年上榜嘅《正義迴廊》(第九位)，整個年度熱搜電影榜上有六部港產片，可見近年香港觀眾對港產電影嘅興趣。

而熱搜本地娛樂名人榜上，香港首位日本AV女優素海霖就成功登頂，力壓發生不快事件的澳門YouTube頻道「微辣」，以及捲入虛擬貨幣交通所JPEX事件中嘅「陳怡」(順帶一提，JPEX亦係年度頭條第二名)。其餘上榜名人則有林作 (第四)、何超蓮 (第六)、杜如風 (第七)、獲威尼斯終身成就獎兼出現New Jeans MV嘅梁朝偉 (第八) 、應屆港姐冠軍莊子璇 (第九)，以及周吉佩 (第十)。

熱搜環球娛樂名人方面，黃子佼及炎亞綸兩位身陷醜聞嘅台灣藝人分估一、二位，第三名係成為首為亞裔奧斯卡影后嘅楊紫瓊，第四位為年中被爆不倫的日本女星廣末涼子。