8月時，日本麥當勞曾經公佈薯條形狀、亦真係會散發出薯條味嘅香薰，雖然當時官方已經講到明只係概念，唔會真係投產，但亦無阻一眾日本網民高呼「Shut up and take my money！」。或者就係因為見到Fans們嘅熱情，所以麥當勞近日公佈嘅「2024年福袋」中，就赫然出現一個「薯條加濕器」，算係滿足咗Fans嘅心願啦。

日本麥當勞近日公開與著名廚房用品品牌Bruno合作嘅2024年福袋，當中除咗有與Bruno聯乘嘅毛巾、餐碟及散銀包外，最搶眼嘅當然就係薯條形狀嘅加濕器。從公開嘅圖片可見，呢個「薯條加濕器」外殼主要為塑膠，體積大概與一包大薯條相等，插電後水霧會從上方薯條正中噴出。講真整體造功就算唔上係「精美」架啦，但就充滿話題及趣味性。

日本麥當勞表示2024年福袋售價為3,000Yen，但入面嘅產品總值3,430Yen，所以買到就已經有「賺」。其中10%嘅福袋仲會再多一張500Yen嘅麥當勞禮品卡。而如果你想入手的話，就要先於12月19日晚上23:59前於日本麥當勞嘅手機App上登記，再要於12月25日舉行嘅抽選中被抽中，先可以於1月1日至8日期間，於選定嘅麥當勞門市購買。睇黎身在香港嘅大家應該好難買到啦。

資料來源：日本麥當勞