MCU電影大反派「征服者康」男星Jonathan Majors今年3月因涉嫌毆打女友被捕，並於本月初開審，經過兩周審訊後，Jonathan Majors最終被判三級魯莽襲擊罪(Reckless Assault)及騷擾罪成立，並於明年2月6日判刑，將面臨入獄1年最高刑罰。

消息公布後，迪士尼及Marvel Studios火速宣布解僱Jonathan Majors，意味住佢唔會再喺未來嘅MCU作品扮演征服者康，而由佢主演嘅電影《Magazine Dreams》亦宣布暫停上映。有鑑於「征服者康」一角對MCU第5及第6階段舉足輕重，甚至第5集《復仇者聯盟》直頭叫做「康之王朝」，相信Marvel而家都非常頭痕，一係就換角邀請另一位演員飾演征服者康，一係就將現有故事線砍掉重練，改由末日博士或其他著名反派擔任第6階段終極Boss。

而實際上Marvel亦試過半途換角，例如「戰爭機器」起初係由Terrence Howard飾演，其後Marvel嫌佢片酬太貴所以改由Don Cheadle接棒演出。