Netflix日前公開「Next On Netflix 2024」宣傳片，展現將於今年內播出嘅精彩作品，其中《魷魚遊戲》第二季於片尾壓軸登場。由李政宰飾演嘅成奇勳染上一頭紅髮，接到一通電話後決意放棄前往美國生活，並揚言「無論用任何手段，我一定會搵到你。」誓要找出魷魚遊戲嘅幕後主腦。

除此之外，官方亦透過社交媒體公開4張全新劇照，包括招攬窮人參加魷魚遊戲嘅「西裝男」孔劉，手持左輪手槍與李政宰對峙，其餘劇照分別係李秉憲脫下面具、李政宰染回黑髮站在正方形頭套工作人員後方，以及新加盟嘅朴圭瑛手持遊戲邀請卡，唔通又再舉辦多次魷魚遊戲？

《魷魚遊戲》第二季同樣由黃東赫執導同編劇，除咗李政宰、李炳憲、魏嘏雋、孔劉等原班人馬回歸，仲會加入《絕世網紅》朴圭瑛、《未生》任時完、《山茶花開時》姜河那、《黑暗榮耀》朴成焄、《人間失格》梁東根、《Sweet Home》李陣郁、前BIGBANG成員崔勝鉉（T.O.P）等新臉孔。