改編自經典童話《小熊維尼》嘅血腥真人版電影《Winnie the Pooh: Blood and Honey（小熊維尼：血與蜜）》去年推出後引起熱烈討論，雖然評價非常麻麻，甚至入選埋影史百大爛片，但勝在夠gimmick吸引到大量觀眾入場，成功以不足10萬美元成本斬獲520萬美元房票。有見及此，片商決定添食開拍續集，除咗預算大升級，今次更加入殘暴版跳跳虎同貓頭鷹。

《Winnie the Pooh: Blood and Honey 2》同樣由Rhys Frake-Waterfield執導，預算為首集嘅10倍，其中小熊維尼嘅假肢就花費2萬美元，相比起首集全套小熊維尼套僅花費770美元，可預期視覺效果將會更加逼真。故事講述Christopher Robin發現小熊維尼一行人存在後，維尼感到家園及生命受到威脅，於是聯同小豬、跳跳虎及貓頭鷹一齊走出森林，殺到Christopher Robin家鄉展開復仇，證明佢哋比任何人都致命、強大及聰明，預計3月15日於美國正式上映。