早前日本Camshop曾推出過以《頭文字D》內拓海愛車AE86為造型嘅無線滑鼠，而近來佢哋又再接再厲，推出原作中高橋涼介愛車「Mazda RX-7（FC3S）為藍本嘅滑鼠，用咗嘅話相信大家郁隻滑鼠時，都會喺心中大叫，「你冇得同我架FC鬥…C鬥C鬥C鬥…」！

作為同款商品，今次嘅FC同上次嘅AE86嘅設計理念其實都係大同小異，同樣地完美復刻《頭文字D》中涼介架FC嘅造型，左右鍵及滾輪設置於引擎蓋位置。但稍為要注意嘅係，雖然現實中嘅FC體積應該要比AE86大少少，但變成滑鼠之後就反而係FC較細（闊長高：4.5cm X 10.5cm X 3.1cm），可能較為適合手掌較小嘅用家。

另外FC滑鼠亦會隨機附送三款涼介主題滑鼠墊嘅其中一款。售價方面就係7,700Yen（約HK$400），比AE86版稍貴。另外Camshop其實都有出啟介架黃色RX-7 （FD3S）嘅滑鼠，售價同係7,700Yen。

資料來源：Camshop