《Game of Thrones》衍生劇《House of the Dragon》嘅第二季將於6月16開播，而繼去年12月發佈首條預告，近日HBO一次過釋出三條新預告，並分別以「黑黨」、「綠黨」、「決鬥」為主題，當中分別以兩黨角度出發嘅「黑黨」、「綠黨」預告，更頗有競選演說嘅味道，而且不停強調戰爭的暴力及後果，帶出新一季劇情嘅激烈鬥爭。

三條預告中，「決鬥」預告最短，僅有39秒，當中仲有大半係劇集Logo黎，只有15秒穿插黑綠兩黨各自嘅，睇完基本上都冇咩得著。而黑綠兩黨嘅預告就刻意採用相同嘅鋪排。首段分別係兩黨領導人Rhaenyra及Alicent嘅自白，並強調兩黨繼承「Iron Throne」嘅合法性。

黑黨Rhaenyra強調嘅係其父Viserys老早將其（當時）唯一子女，即係佢自己立為繼承人，並到死前都冇變更，所以其王位係被綠黨竊去；而綠黨Alicent就一再強調Viserys臨終前提到「Aegon應成王」，而佢個仔就叫Aegon，所以王位應由Aegon繼承。兩者均頗有「競選演說」嘅味道。兩條預告嘅後半段就包含兩黨支持者對家族內戰嘅睇法，並明示暗示戰爭帶來嘅殘酷。

順手幫大家簡單回顧一下上季劇情。國王Viserys膝下無子，故半推半就下將女兒Rhaenyra立為繼承人。而Rhaenyra嘅好友Alicent被其宰相父親強逼主動親近國王，最後亦真係成為王后並生下長子Aegon，成為王位競爭者之一。Viserys晚年病重時雖然拒絕換儲，但臨終前卻對Alicent私下說出「Aegon應成王」——從語境而言，佢應該係指Targaryen嘅開國君主Aegon一世——結果被Alicent利用，將兒子Aegon推上王位，引起由Rhaenyra領導嘅「黑黨」，以及由Alicent領導嘅「綠黨」之間嘅繼承之戰。