日本唔少著名雜誌例如漫畫雜誌《週刊Young Jump》、《週刊Young Magazine》、《週刊Champion》，寫真雜誌《FRIDAY》、《FLASH》，或係男性向綜合形雜誌《週刊Playboy》、《週刊Post》等，雖然每期都會搵黎唔同女星拍攝寫真做封面，但就並非「18禁」雜誌，喺日本便利店一樣可以買到（如果你見到有啲用繩綁住，其實係防止啲人「打書釘」），亦係唔少遊客去到日本必定會參觀嘅景色之一。

不過，近來有人發現日本某政黨嘅官方雜誌，竟然做緊一個全國性問卷調查，並將以上提到嘅所有雜誌都列為「成人向雜誌」，仲話會將收集到嘅資料帶去聯合國投訴。令網民大呼「焚書！」

《週刊Playboy》封面

《週刊Young Jump》封面

《週刊Young Magazine》封面

卻說上月中時，曾成立支援AV女優及性工作團體嘅日本女作家「中山美里」於個人X（Twitter）發文，表示日本某政黨嘅官方刊物《赤旗新聞》中，邀請讀者掃QR Code去做由「新日本婦人」舉行嘅全國性調查問卷。

問卷開首表示，佢哋於12月底進行過調查，發現「本應通過我們活動而被消除嘅便利店成人雜誌，在許多地方又重新出現」，所以今次佢哋決定做個更大型嘅全國調查，睇下「將女性視為玩物的成人雜誌，是否被放置在所有性別及年齡人士都可以接觸到的便利店內」，並會將調查結果提交便利店總公司及聯合國「消除對婦女一切形式歧視公約」委員會。簡單黎講即係試圖挾「民意」逼日本便利店停止出售此類雜誌。

問卷中嘅選項

但當「中山美里」仔細睇個問卷內容，就發現問卷中嘅選項，竟然將上述一眾寫真、綜合形雜誌包含在內，更離譜嘅係，連一眾青年向漫畫週刊都一樣上榜，可以話將目前日本市面上所有男性向雜誌都囊括其中。於是中山美里就呼籲網民於問卷中回答「沒有放置成人向雜誌」，希望左右調查結果。

而日本網民對此問卷嘅反應亦頗為激烈，認為針對其他雜誌或者有理，但連漫畫週刊都包括在內就係矯枉過正，有人高呼政黨試圖「焚書」，亦有人指要向日本「公益社團法人全國出版協會」去信支持出版社。

資料來源：Together、Comicbook