繼三集《侏羅紀公園》以及Chris Pratt主演嘅三集《侏羅紀世界》後，環球近日打算開拍《侏羅紀》系列嘅第七集（暫稱《侏7》），傳閒仲搵黎Scarlett Johansson做主角。不過據荷里活爆料人Daniel Richtman指，雖然開拍之期逼在眉睫，但目前環球影業仍然為男主角人選煩惱中，事關佢哋心儀嘅男星通通都婉拒出演。

據Daniel Richtman指，《侏7》將會有六位主角，當中三位係成年人，三位係青少年。而其中一位成年女性角色，即傳聞中Scarlett Johansson計劃出演嘅，將會整套戲嘅最重要核心，但其餘兩位成年角色目前就未有人選。據知環球影業曾經搵過Scarlett Johansson嘅《Avengers》拍擋Chris Hemsworth以及Chris Evans，但二人均已婉拒出演；另外會於James Gunn執導嘅新《Batman》電影中飾演Lex Luthor嘅Nicholas Hoult亦曾經係心水名單之一，但就因為拍攝《Superman》檔期而趕唔切。據知環球影業目前仍打算將《侏7》放到明年7月上映，換言之開鏡日期已經逼在眉睫，必須儘快搵到男主角人選。

而第三位成年角色，據知就會由近來自導自演電影《Monkey Man》（台譯怒火狂猴）嘅Dev Patel演出。《Monkey Man》同樣由環球影業發行，於北美上映獲得唔錯評價，亦令環球影業希望進一步與Dev Patel合作。至於三位青少年主角，據報就係「兩姊妹加姊姊男朋友」嘅組合，目前同樣未有公佈人選。

資料來源：Daniel Richtman