打機一直以黎都被視「唔係咁好」嘅休閒娛樂，輕則就被人話打機「不務正業」，重則就話打機「教壞細路」。不過近日有個外國研究，就發現打機其實都有正面效果，例如舒緩大家日頭返工時嘅壓力，甚至可以令你第二朝起身時更有朝氣！

來自土耳其伊斯坦堡Medipol大學及荷蘭鹿特丹Eramus大學嘅研究團隊，搵黎65名平均年齡25.5歲、有正職、而且會定期遊玩主機遊戲嘅玩家，並要求佢哋紀錄於五個工作天，以日記方式每日兩次地紀錄自己嘅行為與心情。其中放工後嘅日記需要紀錄佢哋放工後嘅活動、打機時長等資訊，同時亦有測量「從工作中抽離」及「掌握性經驗」（即從遊戲中學到某樣嘢、遇到新挑戰等）嘅水平。而第二朝嘅日記就要紀錄休息一晚後嘅身心狀況，例如體力恢復、認知警覺性等。

兩者結合後，研究團隊發現打機能顯著地增加玩家「從工作中抽離」嘅水平，同時能提升「掌握性經驗」，而且打機時間越長，兩者嘅水平就會越高，隨後瞓覺嘅恢復效果亦會更好。研究亦發現，如果玩家能夠「和諧地熱愛」打機，透過打機獲得嘅恢復效果就會更好；反之若果係「強制性熱愛」——粗略理解即係有啲成癮嘅傾向——恢復效果會削弱之餘，仲有可能影響睡眠、形成反效果。

換言之，只要心態正確，玩家係可以主動地透過打機而減輕工作壓力、提升休息效用。

資料來源：Recovery from work by playing video games