對於各位成年人而言，用錢買部遊戲主機返屋企並唔困難，但買完返屋企有冇時間玩就係另一回事啦。而「買完唔玩」嘅後果除咗浪費錢、部機食塵之外，原來仲有可能令到部機「變磚」，就連任天堂官方都於X（Twitter）發文，提醒玩家「唔玩都叉下電」。

圖片：https://x.com/nintendo_cs/status/1780069862964113734

話說日前任天堂嘅日本客戶服務部於官方X發文，提醒玩家「遊戲機及其他裝置內嘅鋰電池如果長期唔用，又唔叉電，可能會無法再叉電」，並提醒玩家「應每六個月叉一次電」，結果就吊出大批玩家留言自己嘅慘痛經歷。例如有疑似學生表示自己部Switch被媽媽沒收咗超過一年，到拎返時電池電量點叉都係少得可憐；亦有唔少人表示睇到篇文先知自己部Switch點解著唔返。

另外亦有熱心網民留言，提醒大家鋰電池唔鍾意「冇電」同「滿電」兩個極端狀態，所以最好係將電量保持喺20%-80%之間，唔玩嘅話就每半年拎出黎叉到50%再收返埋。另外亦有網民提到，唔少部Switch係長期插喺個座上面駁電視，所以係長期叉滿電，如果對電池有影響的話，希望任天堂未來能夠推出「叉到80%自己停」、又或電力旁路（即電力可以繞過主機電池，直接供電予其他連接裝置）等功能。但點都好，如果大家部Switch好耐冇郁過，或者係時候拎返出黎叉叉電啦。