為紀念《機動武鬥傳G高達》播出30周年，官方日前宣布將於今年夏季推出全新外傳以及本篇結局後續故事，並由當年嘅動畫總監督今川泰宏回歸操刀！

1994年播出嘅《機動武鬥傳G高達》講述各個殖民衛星國家為爭奪地球主權，每四年就派出一名代表進行高達擂台賽，贏家可獲得未來四年對地球以及各個殖民國家嘅統治權。由於故事充滿大量香港元素，角色名字及招式都致敬咗大量港產片、武俠小說，甚至專程製作粵語插曲《戰鬥男孩》及主題曲《高空遨翔》，所以特別受香港高達Fans喜愛。

值得一提嘅係，今川泰宏更於紀念官網使用粵語寫下感想：「東方不敗係電視動畫中離世已經係好耐以前…未竟嘅事，扮作唔知嘅事…呢啲事情係我腦海入邊已經30年了，我想大戰一場，卻冇一個格鬥擂台。一路嬲緊自己唔做嘢，只係瞓覺嘅呢段時間，我變肥咗。但我的這隻手正紅火地燃燒，終於打破咗垏墻來到出邊嘅世界！究竟會同邊個人、展開點樣嘅戰鬥？開戰嘅鑼聲即刻就會響起！」似乎係暗示緊新作將會係關於東方不敗嘅故事。