唔知幾時開始，MCU嘅觀影門檻愈嚟愈高，每逢有新作都要事前惡補N部電影及劇集，先能夠充分理解故事內容。不過，嚟緊7月上映嘅《Deadpool & Wolverine（死侍與狼人）》，導演就拍晒心口表示觀眾無需做「功課」都可以睇得開心。

本年度唯一一部MCU電影《Deadpool & Wolverine》上周公開全新預告，當中包含不少過往Marvel作品角色及彩蛋，並預計會有大量客串及角色變體登埸，對於死忠粉絲嚟講固然興奮，但唔係好熟Marvel嘅觀眾又係咪需要做定功課呢？最近導演Shawn Levy接受《美聯社》訪問時表示，睇佢嘅電影唔需要強制做任何事前功課。

Shawn Levy表示：「我讀書嗰陣係一名好學生，會好似成年人咁按時做好功課。不過，當我睇戲嗰陣，就絕對唔會想做『功課』。我好尊重同感激嗰啲對角色及故事世界觀有深入認識嘅狂熱Fans，但我唔想假設所有人都有呢種程度嘅了解，呢部電影係為娛樂而製作，觀眾無需做任何事前研究就可以欣賞。」