唔少家長都會怕小朋友太過沉迷或者傷眼，而拒絕購買遊戲機，但如果小朋友因為冇機打而無法融入群體，大家又會點做呢？最近一位日本媽媽就因為呢個問題詢問廣大網友，結果大部份人都支持應該購買遊戲機。

一位名為「はるるん」嘅日本媽媽日前於X上表示：「我有個讀緊小學三年級嘅小朋友，我哋屋企從來唔會畀佢打機。不過最近阿仔同我講，佢嘅朋友都有Switch遊戲機，而佢因為唔想被排擠就講大話自己都有Switch，只係放咗係屋企冇拎出嚟。結果佢班朋友一齊玩Switch嘅時候，阿仔只能夠一個人玩波。而家應該點算好呢...」

貼文隨即引起熱烈討論，超過3600萬次瀏覽，其中支持唔買遊戲機嘅人表示：「我自己都係喺一個冇遊戲機、電腦及智能手機嘅環境長大，但我認為我有好多朋友。」、「我細個冇遊戲機，亦因為咁令我從小學開始享受到戶外玩耍及學習嘅樂趣，咁樣並唔可憐，沉迷電子遊戲嘅小朋友先係真正嘅可憐。」、「我都冇畀小朋友打機，但會每天要佢去參加體育活動，所以結佢識到其他圈子嘅朋友，另外仲會同朋友一齊捉將棋。」

然而，更多網民認為呢個情況已經唔單只係畀唔畀打機，更牽涉到小朋友社交及成長，若然經濟能力許可就應該購買：「小朋友真係好可憐，最好唔好再繼續咁做喇。我屋企都係咁樣，從來唔畀我接觸流行事物，所以無法同其他朋友交流，十分難受。咁樣會對小朋友社交造成嚴重負面影響，我至今仍然對父母心存怨恨。」、「我屋企都係自細唔畀我打機，我覺得咁樣會導致小朋友憎父母一輩子，所以最好唔咁好做。至少我嘅恨意好深（真心話）」、「或者父母會認為自己只係剝奪咗小朋友玩遊戲嘅權利，但實際上，佢哋剝奪埋小朋友『共同話題』及『共同遊玩機會』。無論小朋友有幾優秀，佢最終都會被排擠在外，無法融入團體。」

另外亦有人認為禁止小朋友打機，只會帶來更大嘅反彈：「個啲屋企唔準打機嘅小朋友，長大後無一例外會變得相當沉迷遊戲，甚至會喺遊戲花費大量金錢，所以最好畀佢哋打下機，等佢哋厭倦遊戲。」、「我細個嗰陣父母都係唔準我打機，所以當我升讀大學後，有更多時間同金錢時就沉迷於遊戲，甚至搞到差啲留級。除非有咩特殊情況，否則我都唔會限制自己小朋友打機。」

經過網民激烈討論後，「はるるん」最終買入一部Switch OLED主機連同《寶可夢 朱》、《任天堂明星大亂鬥特別版》、《斯普拉遁3》、《瑪利歐賽車8 豪華版》4款遊戲，並表示會同小朋友共同制定打機嘅規則，非常感謝大家嘅意見。