由Zack Snyder執導嘅經典戰爭電影《戰狼300》，講述300名斯巴達勇士面對實力懸殊嘅波斯大軍仍然堅毅不屈，死守溫泉關抵抗入侵，加上拳拳到肉嘅打鬥場面，被唔少影迷封為男人的浪漫，其中「This is SPARTA !!!」一幕更被無數網民惡搞瘋傳。

據外媒《Variety》獨家報導，華納兄弟正在開發《戰狼300》電視劇集，並計劃邀請Zack Snyder回歸擔任導演及執行製作人，而曾參與兩集電影製作嘅Deborah Snyder（佢老婆）亦有機會一同回歸。由於目前仍處於早期開發階段，官方尚未確定劇情、編劇及演員人選等細節，但據消息人士透露，呢部全新劇集將會係2006年電影《戰狼300》嘅前傳故事。

值得一提嘅係，Zack Snyder曾於2021年透露，佢喺疫情期間寫過一份《戰狼300》第三集劇本，故事講述亞歷山大大帝與右輔大臣Hephaestion之間嘅關係，係一部融合戰爭與同性愛情嘅電影，不過華納睇完之後並冇太大興趣。唔知Zack Snyder會唔會喺呢部劇集加入同性元素呢？

Hephaestion係亞歷山大嘅右輔大臣，學者認為佢好有可能係亞歷山大嘅同性戀人。（圖片截自電影《Alexander》）