雖然迪士尼近年積極將自家經典動畫翻拍成真人版電影，而且票房都尚算OK（口碑另計），但佢旗下嘅3D動畫工作室Pixar就冇打算效仿，更傾向製作原創且獨一無二嘅作品。

隨住新作《Inside Out 2（玩轉腦朋友2）》即將上映，近日Pixar首席創意官Pete Docter接受《時代雜誌》專訪，被問到有影迷發起活動，希望《The Crown（王冠）》《Challengers（挑戰者）》男星Josh O’Connor出演真人版《Ratatouille（五星級大鼠）》時，Pete Docter就直接否決了呢個可能性，並表示Pixar暫時冇興趣翻拍真人版電影。

影迷希望Josh O’Connor能出演真人版《五星級大鼠》男主角Linguini

Pete Docter表示：「雖然我咁講之後可能會自打嘴巴，但呢件事真係困擾咗我好耐。我鍾意製作原創而且獨一無二嘅電影，我對翻拍唔係好感興趣。」並指出要將Pixar作品翻拍成真人版非常困難：「我哋好多故事之所以可行，係因為基於動畫世界規則創造。就好似如果一個真人喺一間飄浮嘅房屋入面（意指《沖天救兵》），觀眾就會諗『間屋咁重，氣球係點樣吊起間屋嘅呢？』但如果屋入面係卡通人物，觀眾就唔會產生質疑，我哋所建立嘅世界並唔係咁容易轉譯。」

《沖天救兵》