為紀念《機動武鬥傳G高達》播出30周年，官方宣布將於7月5日推出全新外傳故事「天地天愕」，並由當年嘅動畫總監督今川泰宏回歸操刀，高達迷切勿錯過！

據官方介紹，「天地天愕」故事背景定在第13屆高達武鬥決勝大會開幕前，講述成為新洗牌同盟嘅杜門卡遜等人，被各國鬥士質問繼承洗牌同盟嘅真意時，一時之間唔知點答。就喺未交出明確答案之際，決勝大會隨住杜門卡遜與東方不敗演武正式宣告開幕，然後突然殺出五部自稱係「暗黑洗牌同盟」嘅謎之高達...。

不過，官方未有表明外傳係以小說、漫畫定還是動畫方式連載，我諗Fans們當然最希望睇到動畫啦，而官方又可以趁機賣新模型添(好似係)，實際採用咩載體要等7月5日揭曉。

1994年播出嘅《機動武鬥傳G高達》講述各個殖民衛星國家為爭奪地球主權，每四年就派出一名代表進行高達擂台賽，贏家可獲得未來四年對地球以及各個殖民國家嘅統治權。由於故事充滿大量香港元素，角色名字及招式都致敬咗大量港產片、武俠小說，甚至專程製作粵語插曲《戰鬥男孩》及主題曲《高空遨翔》，所以特別受香港高達Fans喜愛。