根據美國網站「National Day」中對9月12日「Video Game Day」嘅介紹，自1958年嘅《Tennie for Two》至今，已經有超過500萬款電子遊戲推出市面。當中絕大部份都係互不相關嘅獨立作品，但亦有一部份會用上同樣嘅角色不停推出新作（例如任天堂嘅Mario系列）。咁大家又知唔知道，遊戲史上於最多不同作品登場嘅角色係邊個呢？如果話，個答案講出黎你都未必知係邊個，你又信唔信呢？

ゲーム業界激震の新事実 pic.twitter.com/F1sLP39kFe

— 三戸キャップ (@mitocap_1216) July 9, 2024

卻說日本搞笑藝人「三戸キャップ」早前上傳咗一條「冷知識影片」，片中佢提到日本推出過嘅電子遊戲總共有過2萬款，而當中出場次數最多嘅角色，卻唔係連奧運都去到嘅Mario，或者如超音鼠、Donkey Kong等長壽系列嘅主角，而係一個叫做「山本昌」嘅人。其實山本昌係一個現實中存在嘅人，而且係由1994至2016年一直於日本職棒打比賽嘅棒球選手。咁點解一個棒球選手能夠成為出場次數最多嘅遊戲角色呢？咁就要多得Konami推出嘅《實況野球》遊戲系列。

《實況野球》係一個自1994年推出、以二等人身Q版人物為角色嘅棒球遊戲，但入面出場嘅選手都係根據當時嘅日本球隊而決定，換言之只要有效力過日本職棒球隊，你就有機會於《實況野球》中出場。而《實況野球》系列嘅另一個特色，就係會隨住球季進行、人員變動而推出多個版本，例如每年夏天都會推出新作，到每年年尾就會推出當年嘅「決定版」。《實況野球》嘅推出方式，加上山本昌嘅超長球員生涯，就代表自1994年第一隻《實況野球》開始，到佢2016退役為止，佢至少於31隻《實況野球》嘅主要版本出埸過，如果計埋於不同主機平台推出嘅N個版本，數量更會以倍數上升。

但要注意嘅係，「三戸キャップ」畢竟只係個搞笑藝人，佢提供嘅資訊未必會完全準確。例如簡單在網上搜尋，就可以知道整個《Super Mario》系列共推出超過300隻電子遊戲（包括Mario Kart、Mario Golf等），可見Mario嘅出場次數應該係以百次計。所以關於山本昌係「出場次數最多嘅遊戲角色」一事，大家當係趣聞聽下就好了。