射橡筋乃係每個男仔細個必玩嘅遊戲之一，而如果讀緊小學嘅你能夠拎出一把橡筋槍，當日小息嘅風雲人物就必定係你。而雖然大部份人長大後都唔再玩橡筋，但呢個世界仍然有人為射橡筋而努力。好似日本網民「理基（riki_tanimura）」咁，過去多年就於X（Twitter）發佈多款自己設計、有型又射得準嘅現代橡筋槍，其中最新發佈嘅「卡片橡筋槍」更因為充滿特務感而成日本網絡熱話。

翻睇「理基」嘅X，可見佢早於2018年就已經開始製作木製嘅「橡筋長槍」，隨後佢就用唔同物料、設計，創作過多款外觀、性能都唔同嘅橡筋槍，當中有各種手槍、長槍，甚至有先將橡筋裝上彈閘之上，再將彈閘放入彈盒裝上槍身，射完仲識退膛嘅複雜設計，完全係「Over-engineering」嘅俵俵者。但你又唔好話佢無聊呀，佢整出黎嘅橡筋槍唔止有型，準繩度仲非常高，睇佢於X及Youtube上嘅試射影片，於幾尺內射一粒豆咁大嘅目標都例不虛發，完全係男孩子心中嘅「Dream Gun」。

而早前佢就公佈咗新設計嘅「卡片槍筋槍」。槍支本身係一塊薄薄嘅卡片大小金屬片，但打開就會見到扳機、按下扳機槍身就會翻出，然後就可以上彈（橡筋），再扣多次板機就可以發射。設計精良之餘仲充滿特務感，成為日本網絡嘅熱話。

順帶一提，「理基」亦有於個人網站上販售佢製作嘅橡筋槍，不過目前就只有一個型號（不同顏色），希望佢未來都會將「卡片橡筋槍」等其他設計上架啦。