夏日炎炎，面對炎熱天氣現代人可以開冷氣，但面對炎熱天氣帶來嘅蚊蟲問題，特別係臨瞓著前喺你耳邊「Wee」足一晚，但你一起身開燈佢就影都冇嘅死人蚊，就算係現代人好多時都束手無策。不過近日一間以色列就推出被網民稱為「蚊子版鐵穹」嘅「蚊子標記器」，或者可以解決呢個問題啦。

所謂「鐵穹」（Iron Dome），其實係指以色列自家研發嘅飛彈偵測及攔截系統，大家早排有睇新聞應該都知呢個系統有幾咁厲害。而由以色列公司「Bzigo」推出嘅「Iris」就用咗類似嘅原理，利用廣角攝影機和電腦視覺軟體，24小時掃瞄房間內出現嘅蚊子影蹤，到隻蚊停低時佢就利用App，或者於夜間直接用紅光鐳射向用家標記出蚊子嘅位置，用家就可以擸齊架生去拍死隻蚊。

Bzigo Iris官網上話自己簡單易用而且無需後續打理，亦強調自己用上AI分析蚊子蹤跡，能夠辨認出所有蚊子種類，仲有對人體無害嘅鐳射標記，以及配備紅外線鏡頭可於夜間使用等。

Bzigo Iris早前推出後，就吸引到唔少網民留言，唔少人都話佢400美金（約HK$3150，目前特價339美金）嘅售價太貴，不過亦有人話如果部嘢真係Work，佢願意付出呢個價錢。亦有人對Bzigo Iris只能標記蚊子，而不能自動用鐳射殺死隻蚊感到可惜：「你唔應該拎走部機上面個『Kill』掣㗎！」

資料來源：Bzigo