第76屆美國艾美獎日前曲終人散，由日本演員真田廣之、澤井杏奈等人主演嘅FX劇集《幕府將軍》豪取18個獎，打破艾美獎單一節目於一屆中獲得最多獎項嘅紀錄；更值得一提嘅係，獲得第二多獎嘅《The Bear》同樣來自FX，推翻過去幾年「HBO鬥Netflix」嘅局面。

於美國時間週日結束嘅第76屆艾美獎中，《幕府將軍》不僅成為首部奪得劇情類最佳影集嘅非英語作品，真田廣之及澤井杏奈亦分別贏得劇情類最佳男、女主角，成為首位贏得此二獎嘅日本演員。如果再加上劇集導演之一Frederick E. O. Toye憑第九集「Crimson Sky」贏得最佳導演、以及於上週舉行嘅「創意艾美獎」（即係美術指導、攝影等幕後技術獎）中17個提名贏咗14個，《幕府將軍》於今屆艾美獎共奪得18個獎，刷新由2008年HBO劇集《John Adams》所保持嘅單屆13個獎紀錄。

另一邊廂，同樣來自FX嘅《The Bear》既有飾演Carmen嘅Jeremy Allen White及飾演Richie嘅Ebon Moss-Bachrach分別蟬聯喜劇類最佳男主角及男配角，飾演Tina嘅Liza Colón-Zayas亦獲得同類最佳女配角，再加上Christopher Storer執導嘅第二季第六集《Fishes》獲得最佳導演（該集有Jamie Lee Curtis神級發揮，非常推薦），以及於「創意艾美獎」獲得嘅7個獎，令《The Bear》共奪得11個獎，成為僅次《幕府將軍》嘅第二大贏家。

《幕府將軍》及《The Bear》嘅成功，亦標誌住FX打破過去多年Netflix及HBO嘅「獎項壟斷」。須知道過去10年時間中，HBO（及HBO Max）令年都佔據「贏得最多艾美獎電視台」嘅席位，僅於2021年被Netflix《The Crown》及《The Queen's Gambit》雙雙發力下屈居第二。但今屆HBO最終只獲得14個獎，過去最大競爭者Netflix亦只獲得24個，FX單單《幕府將軍》及《The Bear》兩部作品就已經夠贏。或者代表FX將會正式抬頭，成為獎項季節嘅第三勢力？

FX全名本名Fox Extended，顧名思義就係Fox旗下嘅頻道之一。2019年整個Fox被迪士尼收購後，FX亦轉入迪士尼旗下，繼續製作與迪士尼無關（即係公主呀、Marvel呀、星戰呀之外）嘅劇集。亦係點解FX唔算係迪士尼親生仔、連獎項都分開計，但大家又可以於Disney Plus睇到FX劇集嘅原因。