對比香港嘅八達通，台灣悠遊卡未必比較好用，但就一定更加「好玩」。事關不論悠遊卡公司定係其他第三方公司，都會時不時推出特別、聯乘版悠遊卡，例如早年推出過瘋魔一時嘅「波多野結衣」悠遊卡，最近又有廠商因應《EVA》三十週年推出推初號機、貳號機頭部悠遊卡，真係羨慕死香港《EVA》迷。

台灣廠商「FIRM 369」過去曾推出多款以動漫為主題嘅立體悠遊卡，例如去年3月就己經推出過獲得Khara授權嘅初號機立體頭部款，而且好快就被台灣《EVA》迷一掃之空。所以今年佢哋就「食過翻尋味」，除咗順理成章地推出貳號機版本之外，仲推出有齊初號機、貳號機，而且換上金屬塗裝嘅「同步率100%套組」。就算唔拎出街，放喺屋企做裝飾似乎都係個唔錯嘅選擇。

無論係貳號機定係「同步率100%套組」，目前都於Become True網站上可供預定，前者售價$890台幣，後者則為$1,680。值得一提嘅係網站上寫到明可以寄港澳地區，所以各位好想要嘅話，都可以考慮下入手㗎。

資料來源：Become True